«Ազգային ժողովի կանոնակարգ» սահմանադրական օրենքի 145-րդ հոդվածի համաձայն՝ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովը Հեռուստատեսության եւ ռադիոյի հանձնաժողովի անդամի պաշտոնում Ազգային ժողովին առաջարկել է «Քաղաքացիական պայմանագիր» խմբակցության կողմից առաջադրված Տիգրան Հակոբյանի թեկնածությունը:

Հեռուստատեսության եւ ռադիոյի հանձնաժողովի անդամի ընտրության հարցը քննարկվել է ՀՀ ԱԺ սեպտեմբերի 15-ի նիստում:

«Քաղաքացիական պայմանագիր» խմբակցության ներկայացուցիչ Սիսակ Գաբրիելյանը ներկայացրել է թեկնածուի կենսագրությունն ու աշխատանքային ուղին:

Տիգրան Հակոբյանը շնորհակալություն է հայտնել խմբակցությանն իր թեկնածությունն առաջադրելու համար՝ ներկայացնելով իր տեսլականը ՀՌՀ գործունեության վերաբերյալ: Նա անդրադարձել է մեդիադաշտի եւ ՀՌՀ հանձնաժողովի առջեւ ծառացած խնդիրներին: Մասնավորապես, խոսել է մեդիան կարգավորող օրենսդրության, համացանցային հեռարձակման իրավակարգավորումների փոփոխության անհրաժեշտության, հանրային մուլտիպլեքսի ամբողջ համակարգի վերաիմաստավորման, լեզվական եւ տեղեկատվական անվտանգության մասին:

Տիգրան Հակոբյանի դիտարկմամբ՝ ըստ վերջին երկու օրերի մշտադիտարկման, հանրային մուլտիպլեքսն իրականացրել է հավասարակշռված եւ ճիշտ գործառույթներ:

Պատգամավոր Ռուստամ Բաքոյանը բարձրացրել է ազգային փոքրամասնությունների՝ մայրենի լեզվով հաղորդումներ հեռարձակելու հարցը: Տիգրան Հակոբյանը նշել է, որ խնդիրն առկա է, եւ համատեղ աշխատելու անհրաժեշտություն կա: Նա կարեւորել է ազգային փոքրամասնությունների մասին հայերեն հաղորդումների անհրաժեշտությունը:

Թեկնածուն եզրափակիչ ելույթում ափսոսանք է հայտնել, որ քննարկմանը չէին մասնակցում ընդդիմադիր խմբակցությունների պատգամավորները, ընդգծելով, որ այն, ինչ քննարկվում է, վերկուսակցական է եւ վերաբերում է պետության տեղեկատվական շահերին: Տիգրան Հակոբյանը բոլորին մաղթել է խաղաղ, բնականոն կյանք, որպեսզի կարողանան լրջորեն զբաղվել տեղեկատվական, մեդիակարգավորման խնդիրներով:

Նյութի աղբյուրը www.parliament.am կայք։