ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ՀԱՆՁՆԱԺՈՂՈՎ

ԿԸՀ-ն տվել է պարզաբանում անվճար և վճարովի եթերաժամ տրամադրելու կարգի, ժամերի քանակի և ժամանակացույցի վերաբերյալ

Համաձայն ՀՀ նախագահ Արմեն Սարգսյանի ստորագրած հրամանագրի՝ Հայաստանի Հանրապետության Սահմանադրության փոփոխությունների հանրաքվեն նշանակվել է 2020 թվականի ապրիլի 5-ին: Կենտրոնական ընտրական հանձնաժողովը հաստատել է ապրիլի 5-ին կայանալիք Սահմանադրության փոփոխությունների հանրաքվեի կազմակերպման և անցկացման հիմնական միջոցառումների ժամանակացույցը, համաձայն որի՝ հանրաքվեի նախընտրական քարոզարշավը կմեկնարկի փետրվարի 17-ին:

Տեղեկացնենք, որ Հեռուստատեսության եւ ռադիոյի հանձնաժողովը հանդիսանում է նախընտրական քարոզչության սահմանված կարգի պահպանման նկատմամբ վերահսկողություն իրականացնող անկախ պետական մարմին, որն ապահովելու է հեռուստառադիոընկերությունների եթերային բովանդակության մշտադիտարկումը:

Հանձնաժողովն օրենքով իրեն վերապահված գործառույթները պատշաճ իրականացնելու նպատակով 12.02.2020թ. գրավոր դիմելով Կենտոնական ընտրական հանձնաժողով, խնդրել էր մեկնաբանել, թե որ հեռուստառադիոընկերություններով անվճար և վճարովի եթերաժամ տրամադրելու կարգը, ժամերի քանակը և ժամանակացույցն է սահմանելու կենտրոնական ընտրական հանձնաժողովը:  

ԿԸՀ-ը քննարկելով ՀՌՀ գրությամբ բարձրացված հարցերը տվել է պարզաբանում:

ՊԱՐԶԱԲԱՆՈՒՄ

«Հանրաքվեի մասին» ՀՀ սահմանադրական օրենքի 18-րդ հոդվածի 9-րդ մասով սահմանված` «քարոզչության կողմերին զանգվածային լրատվության միջոցներով անվճար և վճարովի եթերաժամ տրամադրելու կարգը և ժամերի քանակը սահմանում է Կենտրոնական ընտրական հանձնաժողովը» իրավադրույթին համապատասխան ընդունվող որոշումը վերաբերելի է հանրային հեռուստաընկերության և հանրային ռադիոյի համար սահմանված վճարովի և անվճար տրամադրվող եթերաժամին: Այլ հեռուստաընկերությունների և ռադիոընկերությունների կողմից եթերաժամ տրամադրելու պայմանները (գին, տևողություն և այլն) սահմանվում են նրանց կողմից՝ պահպանելով Ընտրական օրենսգրքով և «Հանրաքվեի մասին» ՀՀ սահմանադրական օրենքով սահմանված պահանջները և սկզբունքները ապահովել ոչ խտրական և միատեսակ պայմաններ քարոզչության կողմերի համար

ԿԸՀ պարզաբանումն ամբողջությամբ տես www.elections.am կայքում: